Mandi professôr Eraldo Sgubin

Ai 5 di Zenâr, a 92 agns, al è mancjât il professôr Eraldo Sgubin, personalitât di riferiment pal mont de lenghe e de culture furlanis, par tancj agns Vicepresident de Societât Filologjiche pal Friûl di soreli jevât. O publichìn culì il corot dal president Federico Vicario, tignût tal domo di Cormòns te dì dai funerâi.O soi chi vuê, cun altris cunfradis, pal Professôr Eraldo Sgubin, om di culture e di scuele, di lavôr e di valôrs, o soi chi a puartâ il corot de nestre Societât Filologjiche Furlane a chei di cjase e a ducj i siei amîs, a chei ch’a àn vivût e colaborât cun lui, a chei che lu àn cognossût e a son stâts dongje di lui, intune vite ch’e à passât dut un secul, un secul ch’al à viodût la vuere, la miserie e la distruzion, ma ancje la ricostruzion, il riscat e la redenzion dal nestri Popul.O sin chi tal domo de sô citât par lui, Professôr, par saludâlu e par ringraziâlu, lui ch’al à spindût cetante passion e cetant timp pe famee de Societât Filologjiche, di simpri amì e colaboradôr dal nestri Sodalizi. La sô prime adesion ae Filologjiche e je stade dal 1967, cincuante agns di amôr grant e fuart pe culture e pe storie dal Friûl, di dedizion e di partecipazion a iniziativis, cunvignis, manifestazions e moments ch’a àn segnât lis vicendis dal nestri Istitût e de nestre Regjon. Elet tal Consei gjenerâl, une prime volte dal 1969, al à fat part dal Diretîf par trentesîs agns, dal 1971 al 2007, e soredut al è stât Vicepresident pal Gurizan par cuindis agns, dal 1986 al 2001.Altris a àn plui titul di me, dal sigûr, par contâ la storie de sô vite, par fevelâ des sôs cualitâts umanis e cristianis, dal so amôr pe famee e dai siei afiets, dal so lavôr di docent e di dirigjent scuelastic. No soi chi a ricuardâ il ricognossiment ch’al à vût cul Premi Epifanie o a fâ la liste des sôs publicazions, monografiis o articui su lis rivistis sociâls, su personalitâts de leteradure furlane – par esempli Giovanni Lorenzoni o Dino Virgili – o, ancjemò, la curatele dai doi Numars Unics “Marian e i paîs dal Friûl orientâl”, pal Congrès dal 1986, e “Friûl di soreli jevât”, pal Congrès di Gurize dal 1989. O soi chi par dedicâi un ultin pinsîr. L’an cu ven o varìn il centenari di istituzion de Societât Filologjiche, fondade a Gurize dal 1919, e lui, Professôr, nol sarà a memoreâ chest impuartant aniversari e a fâ fieste cun nô. Ma se o sin rivâts a chest centenari, se la Filologjiche e je cressude par cualitât dai progjets culturâi e pal numar dai associâts, se e je deventade l’ent culturâl di riferiment pal Friûl, l’unic istitût ricognossût in Regjon e a Rome, dal Ministeri dai Bens culturâi, se la Filologjiche e je cumò ative su dut il nestri teritori cuntune rêt di scuelis e di insegnants, chest risultât al è ancje merit so, de sô passion e de sô volontât.O sin chi par saludâlu, Professôr Sgubin, ma ancje pai principis e pai ideâi che lui al à tignûts sù cu la sô vite e il so lavôr. O sin chi a ringraziâlu e a testemoneâ che i siei valôrs a son ancje i nestris valôrs, la solidarietât, la tolerance, la moderazion, l’atenzion e la cure par chei altris, il rispiet pe identitât e pe tradizion dal Friûl. O sin chi par confermâ che la sô strade e je ancje la nestre strade e che si impegnìn, come che al à fat lui, par rindi plui biele cheste nestre Tiere.Mandi, Eraldo, che il Signôr tal merti!