Une straordenarie messe di Nadâl

Guriza in ciertis sôs costumancis e je l’eco di timps lontans, ancje di prime da la sô esistence, costumancis che si rifletin in maniere insolite tal presint. Ciertis ricorencis nus rivochin la grande ereditât spirituâl dal Patriarcjât di Aquilee e dai siei rituâi. E rituâi di Glesie paleocristiane e usancis cavalarescjis si palesin ancjemò te gnot di Nadâl. Par capî il contest storic dal event che si è daûr a contâ, o sei la celebrazion da la Messe di Nadâl intune gnot straordenarie che mai, si à di fâ un pas indaûr di cuasi vot secui. Aquilee e je stade simpri un lûc là che i avigniments a verin impuartance di fonde par la nestre esistence. E fo la prime diocesi, dopo chê di Rome, e di Aquilee si iradiarin efiets no di pôc: par la glesie la cristianizazion, par la politiche la romanizazion. A part la sô funzion principâl, chê gleseastiche (il prin vescul a puartâ il titul di patriarcje di Aquilee al fo Paulin, dal 568 d.C.), il no mancul impuartant podê temporâl al fo metût tes mans dai patriarcjis tal 1077, cuant che l’imperadôr di Gjermanie i concedè la contee dal Friûl al patriarcje Sigeart. E ducj sa il parcè.Come princip temporâl il patriarcje al jere sogjet dome al imperadôr, al veve plene sovranitât sul so teritori e al comandave l’esercit, decidint la vuere e la pâs: al guviernave il Patriarcjât cul baston pastorâl e cu la spade. Ben, tal 1334 pape Zuan XXII al nomenà patriarcje di Aquilee il francês Bertrand de Saint Geniès che, pûr indevant cui agns, al dimostrà di guviernâ in maniere energjiche. Al fo incisîf te aministrazion interne di une regjon devastade colpe calamitâts tremendis (taramots, peste, cjaristiis) e al fasè il pussibil par judâ i sudits in miserie furnint ancje il past cuotidian a doi mil puars. Sicu vescul al cirì soredut di prudelâ la fede cristiane e combati il difondisi da la imoralitât.Al jere l’an 1340. Beltram al jere in lote za di cuatri agns cui Conts di Guriza par la proprietât dal teritori di Vençon, là che la citadine, che i todescs a clamavin Peuschelsdorf, ur impedive il passaç, se no paiavin une mude, a ducj chei che di Vignesie a lavin di là da lis Alps e indaûr. Il Patriarcje Beltram al tacà vuere e dopo di vê metût a sac Cormons al rivà daprûf dal cjascjel di Guriza. Ma il valôr dai difensôrs e il crût dal invier lu oblearin a la ritirade e a plantâ la tende al viert. Al celebrâ la messe di Nadâl a cîl viert e, par pôre di un atac di sorprese de bande dai gurizans, cun aduès la armadure e la spade poiade dongje l’altâr a puartade di man. Cussì al rispietà la sô dificile, dople funzion di predi e di condotîr, di patriarcje e di comandant. Dôs potencis di essence divierse a jerin ca riunidis: cristianesim e cavalarie, Glesie e spade, il ream di Dio e il mont laic. I oms di vuardie di ca e di là dal Lisunz a cjantavin imnis di pâs in tiere pûr armâts e pronts a smentî cu la spade chel che l’anime e stave palesant cul cjant.  Di in chê volte i patriarcjis a celebrarin madins cu la armadure aduès e la spade poiade dongje l’altâr.Cheste consuetudin si mantignì a Udin e Guriza ancje dopo la sopression dal Patriarcjât e cuant che il celebrant al impugnave la spade tal domo di Guriza si ricostituive la antighe unitât dal passât. La spade e il baston pastorâl insiemi te identiche azion par che si vadi viers la unitât da la fede. E ancje cumò come alore il ream di Dio e il mont laic insiemi: “Pâs in tiere ai oms di buine volontât”.