Cjarte toponomastiche dal Comun di Gurize

La Fieste de Patrie dal Friûl chest an e vignarà celebrade a Gurize. Mai moment al è plui oportun par celebrâ cheste zornade a Gurize: un moment par fevelâ di autonomiis locâls indulà che la stesse autonomie dal Gurizan e je metude in forsit. La Fieste si le fasarà domenie ai 7 di Avrîl e, tal prossim numar di “Friûl di Jevât”, o fevelarìn di dut il program da la zornade e da lis manifestazions che a insioraran il program.In spiete di chê zornade, la Societât Filologjiche Furlane e ufrìs a la citât e al Gurizan un gnûf imprest realizât inte suaze dai progjets inmaneâts dal Comun di Gurize cui fonts da la leç 482 dal 1999: la cjarte toponomastiche dal teritori dal Comun di Gurize, che e vignarà presentade ai 22 di Març di bande dal professôr Franco Finco, studiôs di toponomastiche ben cognossût. In cheste cjarte si cjate une schirie di toponims par furlan (gurizan), sloven e ancje la indicazion storiche taliane: un mont che si vierç pe cognossince da la nestre citât. No dome nons di stradis e di placis, ma ancje di borcs e localitâts di dut il teritori dal Comun: dai Cai Eremits a misdì fintremai a la mont di Sant Valantin a nord, di Pubrida a soreli a mont a la mont dal Cjascjel a soreli jevât. Al è duncje un imprest une vore util e interessant par fâ viodi cemût che i toponims storics a son stâts mudâts tal cors dal timp ancje par resons pulitichis. E propit chest al è il fat interessant di cheste cjarte: il progjet al è nassût propit par fâ viodi a ducj i Gurizans di vuê cemût che la citât e je cambiade dilunc dal Nûfcent, e dome cumò – ancje in gracie da lis normativis di tutele la toponomastiche storiche e lenghistiche – la citât e torne a doprâ i vecjos nons ancje par furlan e par sloven. Cheste cjarte di fat e je il risultât di un lavôr a plui mans: da lis indagjinis su la toponomastiche storiche di Gurize, cu la colaborazion da la Consulte comunâl slovene di Gurize, cul coordenament da la Societât Filologjiche Furlane.E ancje la presentazion di cheste cjarte par vierzi lis manifestazions da la Fieste de Patrie e je significative: Gurize, dentri dal Friûl Vignesie Julie, e je une citât diferente indulà che di simpri si son feveladis dutis lis lenghis da la nestre regjon. E se cheste no je autonomie…