Novembar 1919: Guriza mari da la Filologjiche

Ii 23 di Novembar dal 1919, cuant che la regjon furlane e tornave a cjatâ un clime di unitât ancje pulitiche, a Guriza e nasseve la Societât Filologjiche Furlane. D’in chê volte cheste benemerite Socie e puarte indevant un compit fondamentâl, chel di rapresentâ l’Istitût regjonâl di riferiment pal studi, la promozion e la valorizazion da la culture e da la identitât furlane, jenfri storie e teritori, lenghe e art, ativitât di ricercje  e di alte divulgazion. Chest compit, sostignût dai miârs di socis e compagnât da la colaborazion di bande da lis tantis associazions e istituzions culturâls furlanis, talianis e forestis, al è ricognossût sedi da la Regjon autonome, sedi  dal Ministeri pai bens e lis ativitâts culturâls. “La reson dal nestri cjatâsi a memoreâ, cun braùre, un inovâl cussì impuartant – al dîs il President Federico Vicario – e je chê di testemoneâ che i valôrs che par un secul a àn declarât la mission da la nestre Societât a son ancjemò chi a domandânus atenzion, determinazion e impegn”. Chê da la Filologjiche tai siei cent agns di storie e je stade di fat une azion fondamentâl te promozion dai studis furlans in diviers setôrs, une azion leade a strent cul impegn civîl in cuistions di fonde pe nestre comunitât tant che la nassite dal Ent Friûl tal Mont, lis bataiis pe autonomie da la Regjon, pe istituzion da l’Universitât dal Friûl e pal ricognossiment dai dirits lenghistics dal nestri popul.Guriza, la citât ch’e à viodût a nassi la Societât Filologjiche, e sarà la protagoniste da lis manifestazions di Novembar, manifestazions promovudis in colaborazion e cul supuart dal Comun, da la Fondazion Casse di Sparagn di Guriza, da la Casse Rurâl FVG, dal Goriski Muzeji di Gnova Guriza, dal Isis “Dante Alighieri” e da la Scuele di balet classic e moderni “Tersicore”.Dai 7 ai 9 di Novembar jenfri cjasa Ascoli – la gnove sede da la Filologjiche pal Friûl di soreli jevât screade vie pal Istât – e il cjiscjel di Moncorona (Kromberk) si davuelzarà la Tierce cunvigne di toponomastiche furlane (v. l’articul achì a man çampe). Sabide ai 16 di Novembar a lis 9 mancul un cuart di sere tal teatri Verdi al è in program il conciert dal Centenari cu la partecipazion da la orchestre sinfoniche dal Conservatori “Jacopo Tomadini” di Udin, che a presentaran musichis di autôrs furlans – Ezio Vittorio, Mario Montico, Valter Sivilotti, Virginio Zoccatelli – pal plui ineditis e pôc cognossudis (repliche ai 18 di Novembar tal teatri Candoni di Tumieç).Sabide ai 23 di Novembar, zornade dal Centenari di fondazion, il program al tacarà di buinore tal Auditorium “Biagio Marin” dal Liceu Classic “Dante Alighieri” cuntun incuintri dedicât ai students par ricuardâ la impuartance dal plurilinguisim a Guriza; tal dopodimisdì, inte sede da la Scuele di balet “Tersicore” di vie Crispi (il lûc che tal 1919 al ospitave la sale dal Consei comunâl, là che la Filologjiche e je stade fondade) si fasarà la cerimonie uficiâl di comemorazion. La zornade si sierarà al Kinemax a lis 5 e mieze sore sere cu la proiezion in anteprime dal film documentari “L’Atlante della Memoria”, ispirât a la vite e a la opare di Ugo Pellis, un dai pari fondadôrs da la Filologjiche, pe regjie di Dorino Minigutti.Il calendari da lis manifestazions par celebrâ il Centenari, tacât in Otubar, al larà indevant fint in Dicembar; tra lis tantis iniziativis in program, in Friûl e fûr da la regjon, o ricuardìn in particolâr la schirie di incuintris par presentâ il numar unic Friûl par cure di Andrea Tilatti, une opare impuartante che e conte in doi volums cent agns di storie di Filologjiche e di culture in Friûl. Za presentât al congrès sociâl di Udin e a Rome inte sede di rapresentance da la Regjon FVG, il numar unic al sarà puartât cumò ancje a Milan (ai 9 di Novembar) e a Viene (ai 5 di Dicembar, li dal Istitût Talian di Culture).