A la scuvierte dai catalics da la Societât Filologjiche Furlane

Dilunc dai passe doi mês di emergjence sanitarie peade a la epidemie dal Covid19, ancje la Societât Filologjiche Furlane e à scugnût sierâ lis puartis da lis sôs sedis di Udin (Palaç Mantica) e di Guriza (Cjasa Ascoli). Ma no vin mai molât di stâur dongje ai socis e a dute la comunitât furlane metint a disposizion i contignûts dai nestris catalics, bibliografics e fotografics. E je stade une biele sfide, chê di cjatâ in chest timp che dutis lis ativitâts a son stadis sospindudis, come ancje i cors e lis cunvignis, une maniere par puartâ indevant d’istès il nestri impegn tal prudelâ la lenghe e la culture furlane – un impegn ch’al à juste finît cent agns! – e fâlu rivâ a la int.Le vin cjatade, cheste maniere, a traviers dai mieçs che la tecnologjie nus met a disposizion in dì di vuê e che a àn permetût di “scurtâ li distancis” e di fâ “zirâ” la culture ancje tal moment che si scugnive ducj restâ sierâts in cjase. I contignûts ju vevin a puartade di man: i tesaurs conservâts dal nestri Istitût, che cuntun grant lavôr vie pai ultins agns a son stâts ducj digjitalizâts e metûts in linie sul sît internet da la Societât, fat gnûf juste l’an passât a pueste pal Centenari. Tesaurs di fotografiis (il font di cartulinis furlanis dal prin Nûfcent e chel da lis fotografiis che Ugo Pellis al fasè in dute Italie intant che al puartave indevant l’indagjin pal Atlant Lenghistic Talian) e di contribûts bibliografics, gjavâts dai numars unics (i volums che la Filologjiche e publiche ogni an sul comun che al ospite il Congrès) e da lis rivistis sociâls.Par esempli, o savìn che Mai al è par tradizion il mês da la Madone e che in Friûl cheste devozion e je simpri stade une vore sintude: ve alore un “percors” che nus propon cetancj tescj di autôrs impuartants che a àn vût scrit di chest argoment sul “Ce fastu?” e sul “Sot la Nape”: Lea D’Orlandi, Gaetano Perusini, Andreina Ciceri, Gianfranco D’Aronco e altris ancjemò. Contribûts di podê lei e discjamâ in maniere libare in formât pdf. Dut chest al è publicât sul sît filologicafriulana.it e al pues rivâ a ducj cu la nestre newsletter e la nestre pagjine Facebook.In cheste maniere lis puartis virtuâls da la Filologjiche a son simpri restadis viertis… cumò o sperìn di podê tornâ a vierzi in curt a ducj ancje i puartons des nestris bielis sedis!