Perdon de Dolorade: il grant misteri che tocje l’om fin tal font de sô anime

Perdon de Dolorade. Za il non al dîs dut di chiste fieste che e met al centri de nestre riflession il grant misteri dal dolôr, realtât profonde e serie che tocje l’om fin tal font de sô anime.Il dolôr nol à sparagnât nancje il Fi di Diu e tant mancul sô mari, soredut sul Calvari.Par chist, la Madone Dolorade nus ricuarde il dolôr, il tribulâ e i patiments de vite; ducj vuararessin une vite sence nissun torment, ma une vite cussì no esist.La vite e je la robe plui biele che o vin, il regâl plui grant che il Signôr nus à fat; ma ogni tant, si sa, il diaul al met la code e alore dongje dal ben, tanti voltis cjatìn ancje il mâl e i dolôrs de vite.Baste che si cjalìn un pôc ator e dentri di nô par cjatâ une conferme di chiste veretât.O crôt che nol sedi un sacrilegji cjatâ une perfete sintonie tra la Madone Dolorade vistude di neri e lis nestris feminis di une volte, ancje lôr simpri vistudis di neri, pensant soredut ai tancj fruts piçui  che une volte a murivin.A vuê dì, gracie a Diu, no murin plui tancj fruts, ma il cûr di une mari al è simpri compagn, a vuê dì come 2000 agns indaûr; al è un cûr simpri plen di consolazion o di disperazion pai fioi.Pensìn par un moment al bielissim e grant compit di une mari.Dutis lis maris a àn il destin di gjenerâ la vite e la responsabilitât di tirâle sù e di ufrîle al mont: l’avignî de umanitât e je sui zenoi di une mari, inte famee.E mai come vuê il mistîr de mari al è dificil e problematic; nol covente che muri un fi par stâ mâl, ogni judici negatîf, ogni displasê, cuant che l’afiet nol è ricambiât, cuant che no si viôt a cressi ce che si à semenât, cuant che lis sodisfazions a son pocjis se no nissune, dutis chistis robis a deventin une spade che trapasse l’anime di une mari fûr par fûr.E chist al vâl par une mari come par ogni om.Par chist cjalâ a la Madone dai dolôrs e je une maniere cristiane e umane di puartâ cun plui serenitât la proprie crôs.Cun chist significât simpri atuâl, ancjemò une volte, il paîs di Cjopris si prepare a celebrâ il Perdon dai dolôrs cul solit program, chel che si torna a fâ ogni tierce domenie di setembar dal lontan 1756; chist an al cole ai 20 di setembar.Messe grande das 10 di matine; dopodimisdì, gespui das 5 e miege e procession par finî cu la predicje sul sagrât de glesie e il cjant dal Stabat Mater.Daûr, la cene paesane dome su prenotazion, prin di miercus 16. Come simpri, ancje il Triduo das 7 di sere scomençant ta joibe.Uniche novitât: il Covid 19, che nol fermarà il Perdon, ma nus oblearà a rispietâ lis solitis regulis par stâ in sigurece ancje in chist moment.