Jacopo Pirona pari de lessicografie furlane

A colin chest an i 150 agns de muart di Jacum Pirone (Dignan 1789 – Udin 1870), om di letaris, bibliotecari, docent, passionât cultôr di furlan e protagonist de vite culturâl dal so timp. Cu la cunvigne “Jacopo Pirona e la lessicografia friulana”, che la Societât Filologjiche Furlane e à inmaneât pai 10 e 11 di Dicembar dal 2020 cu la poie dal Comun di Dignan e de ARLeF, si cirarà di frontâ plui aspiets des voris dal Pirona. “Il so non è al impuartant – al motive il president de Societât Filologjiche Federico Vicario – pal impegn ch’al à metût te istituzion de Biblioteche comunâl di Udin, erêt dal Museu citadin, pe direzion dal Liceu classic, pai studis in cetancj setôrs di interès regjonâl e pe largje rêt di colaborazions e rapuarts ch’al veve cun personalitâts di prin plan dal Votcent talian”. Ma come ch’o savìn ducj la dimension che i à puartade la notorietât plui grande e je chê di lessicograf. Di fat a lui e al nevôt Giulio Andrea, che lu à vût judât in ducj i moments de redazion dal repertori, ur vin il grant debit di ricognossince pal “Vocabolario friulano”, une vore di impuartance pardabon capitâl pai studis sul furlan, tra lessic e gramatiche, tra toponomastiche e grafie. Cheste cunvigne e sarà duncje une ocasion, cul contribût di innomenâts specialiscj, di indagâ a fonts la biografie di Pirona, la sô vore, il stât dai lavôrs di lessicografie in altris regjons d’Italie e, ancjemò, lis prospetivis de lessicografie furlane dal dì di vuê. La cunvigne si fasarà a distance secont lis leçs in vore: si podarà seguîle in direte streaming sul sît www.filologicafriulana.it. Si vierzarà joibe ai 10 di Dicembar a lis 3 e mieze dopomisdì, cui salûts di benvignût dal Assessôr regjonâl a lis autonomiis locâls Pierpaolo Roberti, dal Sindic di Dignan Vittorio Orlando e dal President ARLeF Eros Cisilino. Il president de Filologjiche Vicario al coordenarà la prime session, su la vite e lis oparis dal Pirone: a fevelaran Romano Vecchiet (“Jacopo Pirona bibliotecario”), Edoardo Colombaro (“Il Vocabolario friulano dalle carte di Jacopo Pirona”), Emanuele Cojutti (“Jacopo Pirona epigrafista in età risorgimentale”), Carla Marcato (“Tra le pagine del Vocabolario friulano dell’abate Jacopo Pirona”), Claudio Marazzini (“Il Vocabolario dell’abate Jacopo Pirona e la varietà dello spazio linguistico italiano”). Vinars ai 11 di Dicembar a lis 10, Gabriele Zanello al coordenarà la seconde session, su la lessicografie dialetâl dal Votcent, cun intervents di Francesco Costantini (“Lessicografia su scala ridotta: tra varietà romanze locali e alloglossia”), Francesco Avolio (“La lessicografia dialettale postunitaria in area centro-meridionale: alcuni esempi”), Lorenzo Tomasin (“Il friulano e Pirona nella lessicografia veneziana e il veneziano nel Pirona”). Simpri vinars ai 11 aes 4 dopomisdì tierce e ultime session su la lessicografie furlane dopo dal Pirone, coordenande di William Cisilino cun intervents di Franco Finco (“I toponimi nella lessicografia friulana dal Settecento ad oggi”), Luca Melchior (“Pirona e il Pirona nella ricerca linguistica ottocentesca: alcuni appunti”), Adriano Ceschia (“I dizionaris e la politiche linguistiche pal furlan inte ete digjitâl”), Gabriele Zanello (“I vocabolari friulani e la letteratura”), Paul Videsott (“Il Vocabolar dl ladin leterar e il suo apporto all’innovazione della lessicografia ladina”). La partecipazion e je libare e vierte a ducj e no covente regjistrazion.