Un “Atlant da la Memorie” jenfri passât e presint

Realizât par celebrâ il Centenari di fondazion da la Societât Filologjiche Furlane, tal 2019, al è cumò daûr a vignî fûr in DVD il docufilm “L’Atlante della Memoria”, pe regjie di Dorino Minigutti.Il film si ispire a un dai paris fondadôrs da la Filologjiche, il grant lenghist Ugo Pellis (nassût a San Valentin di Flumisel tal 1882) e a la grande imprese di ricercje che il Nestri al à vût puartât indevant te prime metât dal Nûfcent par meti adun l’Atlant Lenghistic Talian (ALI): une da lis plui impuartantis impresis dialetologjichis a nivel nazionâl.Il progjet pe realizazion dal Atlant al nassè tal 1924 li dal Istitût pal ALI da la Universitât di Turin e par iniziative da la Filologjiche, che lu à fat bon tal Congrès di Gardiscja dal 1924. Il comitât di redazion al nomenà racueidôr unic Ugo Pellis, che cussì al tacà un viaç che par disevot agns lu à puartât a percori dute l’Italie fin tai puescj plui platâts e tai teritoris da l’Istrie e da la Dalmazie, che in chê volte a jerin talians. In chescj agns Pellis al à puartât insom plui di 700 inchiestis jemplant un milion e mieç di schedis. Dilunc da la sô ricercje al insiorave lis intervistis lenghistichis cun passe 7.000 fotografiis, che a vuê a rapresentin il document straordenari di une Italie che no je plui, sfantade e glotide dal progrès economic e da la industrializazion scolpade tal dopovuere.Cuant che, par câs, il zovin Lorenzo al cjate une schirie di chestis fotografiis, al reste inmagât di chês musis antighis che a distance di scuasi cent agns al somee che i vuelin dî alc. Cul obietîf di tornâ tai lûcs scandaiâts dal Pellis e di cirî lis personis inmò in vite, Lorenzo al partìs par un viaç che dal Friûl lu puarte in Sardegne, une tiere che il Nestri al à vût visitât plui voltis pe sô ricercje. Cussì al tache il film, che a traviers da lis personis che il zovin protagonist al cjate dilunc dal so viaç nus puarte ancje nô a fâ une riflession sul significât da la memorie, in rapuart cu la lenghe, la identitât, la diversitât, l’amôr e la muart. Si puedial cjatâ inte ricercje di Pellis une clâf che nus judi a capî miôr la realtât di vuê? Une realtât, la nestre, li che la “bulimie digjitâl” e je daûr a scancelâ la memorie. Cheste e je la riflession che il documentari al intint ufrî al spetatôr, e trasmeti chei valôrs di curiositât, passion e impegn che Ugo Pellis nus insegne.