Une Setemane de Culture par ducj

Chest e tant altri di plui e je la Setemane de Culture Furlane 2020, che si davuelzarà dai 18 ai 28 di Otubar.Une biele novitât, propit par frontâ la pandemie, e je la pussibilitât di seguî lune buine part dai events in direte e par vie telematiche, events che a saran ancje regjistrâts e a restaran a disposizion dal public dai interessâts: la plui part dai events si podarà seguî dal sît internet de setemane a la direzion www.setemane.it, indulà che si pues ancje consultâ e discjamâ dut il program. I events in linie a permetaran a ducj i furlans, di chenti ma ancje e soredut a chei sparniçâts ator pal mont, di seguî la Setemane: in graciis da la colaborazion cun Ente Friuli nel Mondo la Setemane e sarà promovude pardut.In cheste edizion, la setime de serie, a vignaran ricuardâts inovâi di personalitâts che a àn lassât une olme profonde tal mont da la culture e da la societât furlane: Renato della Torre, Gianfranco D’Aronco, Ovidio Colussi e Riedo Puppo, Enzo Bearzot, Andreina Ciceri, Pietro Someda de Marco, Jacopo Stellini e Antonio Zanon. Come simpri la setemane e sarà vivarose cun cunvignis, concierts, spetacui, presentazions di libris, ativitâts pai fruts e cetantis atris iniziativis. Tra chestis ancje la tradizionâl Fraie che si tignarà a San Vît ai 25 di Otubar: pe prime volte no sarà la Fraie de Vierte ma e sarà la Fraie de Sierade. I apontaments in presince a saran par dut il Friûl: a tacaran propit a Gurize domenie ai 18 di Otubar e si sieraran a Codroip miercus ai 28 di Otubar cu la consegne dal Premi San Simon, il ricognossiment che al premie lis miôr oparis leteraris e a fumuts in marilenghe.L’impegn chest an al sarà ancje chel di dâ un segnâl a ducj i furlans: la nestre lenghe, la nestre culture, la nestre identitât e la voie di cognossi la nestre tiere a son plui fuartis di cualsisei pandemie.