Fraie de Vierte a Dolegne dal Cuei

Si torne a partî di Pieri Zorut… si podarès clamâle cussì la “Fraie de Vierte” che si davuelzarà sabide ai 26 di Jugn a Dolegne dal Cuei, intal cjasâl a Lonzan indulà che tal 1792 al nassè l’autôr dai Strolics.La ocasion par fâ fieste in cheste piçule comunitât e je propit chê dai 200 agns da la jessude dal prin Strolic, burît fûr tal 1821. E duncje, cuale ocasion saressie miôr da la Fraie par ricuardâ, di bande da la Societât Filologjiche, un dai paris da la leterature furlane?Ma cheste e sarà ancje la ocasion par presentâ il numar speciâl da la riviste “Sot la Nape”, che al è stât publicât di pueste par Dolegne. E al sarà un numar pardabon speciâl sedi pai contignûts sedi pai autôrs dai articui: dongje dai salûts dal sindic e dal president da la Filologjiche si tache cui dâts di Dolegne e cuntune bibliografie di riferiment par chei che a vuelin cognossi miôr cheste teritori. Po Enos Costantini nus mene “A torzeon pal comun di Dolegne” e nus conte ancje dal steme dal Comun. Nol pues mancjâ il ricuart di Pieri Zorut a firme di Maria Cristina Cescutti e Ferruccio Tassin, che al conte di “Aghis, stradis, cueis, boscs, vignis e glesiis”; Francesco Boscutti al scrîf dal paisaç; Carlo Petrussi al fevele da la viticulture e Mària Croatto dal Mulin di Trus. No podeve mancjâ la cusine cun doi intervents di gale: Antonia Klugmann, che di Triest e je rivade sul Cuei e nus conte cemût che cu la sô cusine e cîr di valorizâ i savôrs da la tiere. E simpri di savôrs dal teritori al scrîf ancje Roberto Zottar. Par sierâ chest numar speciâl dal “Sot la Nape”, cualchi pagjine che e riprodûs dai articui storics su Dolegne e su Zorut.Sabide ai 26 si fasarà duncje “Fieste da la Vierte” ancje se aromai o sarìn di cualchi zornade za in Istât. La Fraie si varès vût di fâle ai 16 di Mai, dì da la Sense e a conclusion da la “Setemane de culture furlane”, ma la emergjence sanitarie e lis normativis dai sorestants no nus àn permetût di fâ fieste in chê zornade.Dut câs, Vierte o Istât che e sedi, si à metût dongje un program une vore vivarôs e diferent dal solit, ch’al ten cont da la stagjon (par chest si cjatisi sot sere e no a buinore) o ben di altris apontaments che a son te stesse zornade (la partide da l’Italie al campionât european di balon, in program a lis nûf di sere) e soredut da lis normis cuintri la difusion dal CoronaVirus (la jentrade e sarà libare fin che al è puest).Si tacarà duncje a lis sîs sore sere cul bon acet in musiche da la Corâl Fogolâr di Cuar di Rosacis. Dopo dal salût dai sorestants si tacarà cu lis voris da la cunvigne, che a saran insioradis da lis leturis di tocs gjavâts da la opare di Pieri Zorut par cure da la Associazion Teatrâl Furlane.Al scomençarà Enos Costantini presentant il numar speciâl di “Sot la Nape” e po a fevelaran Roberto Zottar su la cusine di chenti e Ferruccio Tassin, che al ricuardarà i predis che tal Nûfcent a àn vuidât lis siet comunitâts di Dolegne.Par sierâ ju intervents, Ada Bier e contarà di cemût che la Filologjiche l’an passât e à savût cambiâ in corse i cors pratics in presince metint sù i cors pratics on line, propit par vie da la emergjence sanitarie. Cheste presentazion e permetarà di premiâ ancje i mestris dai cors pratics di lenghe e culture furlane fats tal 2020.A la fin, un ghiringhel par fâ fieste pe “Fraie de Vierte” e soredut par une “gnove Vierte” che o sperìn di vê dopo dal CoronaVirus.