Don Nino Comar: un grant “sì” al Signôr

Giovedì 7 dicembre è stata celebrata una S. Messa in memoria del sacerdote diocesano don Nino Comar, nel trigesimo della sua morte. La celebrazione, animata dalle locali cantrici, si è tenuta nel Santuario di Madonna di Strada a Chiopris – Viscone, dove don Nino è stato parroco negli anni novanta. La S. Messa è stata presieduta dal chiopresano don Moris Tonso, prima ragazzo e poi giovane seminarista all’epoca in cui don Nino ha esercitato il suo ministero sacerdotale nelle due comunità. All’omelia in lingua friulana, don Moris ha ricordato la figura di don Nino.

O ai gust di dî un dôs peraulis, par ricuardâ don Nino, in furlan, cussì come che simpri o fevelavin tra di nô. E come, o soi sigûr, ancje lui al vedi gust che sedi ricuardât cussì, in chist moment.
Nancje vêle savude, o ai vût la fortune di lâ a cjatâlu, e duncje di saludâlu, cualchi zornade prime che al muri. Fortune, parcè si ben l’etât e jere e lis magagnis di salût no mancjavin, nissun, o crodi, al pensave a une muart cussì improvise.
Di fat, o vevi cjatât un don Nino avonde debilitât tal fisic, sintât su la carocele e stracât dai agns. In ogni câs, ce che mi veve istès confuartât, al jere stât il so spirt, che al jere chel di simpri: il don Nino che ducj o vin cognossût.
Al veve ancjemò la sô vôs fuarte e sclete. Ciâf dal dut a puest, come che al trasparive tal so mût di fevelâ, resonâ e di ricuardâ in mût perfet nons di personis, datis e fats; chei di cumò, come chei di une volte.
Ancjemò ben inzornât su ce che al sucêt atôr pal mont, ma soredut ca di nô, in particolâr inte nestre Glesie di Gurize, tra noaltris predis. La prove plui clare: il fat che – mi diseve – lui nol jere tant d’acuardi o al jere dut câs critic su ciertis sieltis o robis ultimis che son stadis fatis inte nestre Diocesi.
No mi soi maraveât, nuie di gnûf; o savìn come che al jere fat don Nino: bisugnave fâ come che al diseve e stabilive lui, e vonde! E jere la sô personalitât, che al veve conservât fin a la fin: caratar di cuargnûl, fuart e combatîf; grinte e coragjo di vendi; pôre di nuie e di nissun. Forsit propit par chestis cualitâs, il vescul Bommarco, a so timp, lu veve metût in curie a fâ l’aministradôr, incarghe che don Nino le à partade indenant par oltri 20 agns cun grant impegn, dedizion e tante responsabilitât.
Une ulteriôr conferme di cheste grinte, voie di combati e di lâ indevant, le ai vude prime di lâ vie di lui, dulà che si sin lasâts cun l’impegn di viodisi ai 27 di dicembar “Alla Colombara” a Aquilee, par fâ fieste pal so 93esim complean, come di tradizion in compagnie dai siei amîs di cumò e di une volte.
Al veve za dât ordin a so nevôt Dario di organizâ la biele fieste, in particolâr di viodi cui che al jere di invidâ. Scherç dal destin: si jerin metûs ancje a ridi, parcè che dai amîs de sô gjenerazion, ormai a jerin restâts une vore pôcs, dât che la plui part di lôr a jerin za lâts indevant tal reâm dal Signôr.
Po ben: cumò di là, si son cjatâts ducj insiemi. E se di ca don Nino nol è rivât a fâ fieste pal so 93esim complean, come che za al veve programât, di sigûr lu fasarà di là, cun ducj i siei amîs e cuntune taule ancjemò ben plui grande e plui lungje di chê di ca jù.
Ma za un an fâ – e no scherci – don Nino mi veve dit: “Viôt di tigniti libar pal 12 di Jugn dal 2024, dulà che vin di fa fieste pai miei 70 agns e i tiei 20 agns di sacerdozi. Al pensave za a chel biel travuart, un an fâ!
Cussì al jere don Nino: om e predi di compagnie e di fieste. La sô peraule e jere socjalitât! Al veve capît, che cheste e jere la strade par jentrâ tal cûr da int, al di là dal so caratar e mût di fâ, che i dave la pussibilitât di stâ dongje da int, par partâ indenant ben la sô mission di predi e pastôr: tal mieç des sôs pioris!
Pape Francesco al disarès, al dì di vuê: “Pastori con l’odore delle pecore”.
D’altre bande, se nol è un rapuart vêr, dut al risulte plui dificil. E chest al vâl soredut pe fede, che e jè prin di dut un rapuart vêr cun Dio e cul nestri prossim.
La sagre di S. Pieri, i camping in montagne, lis gjitis in Val Marzon, la fieste di Sant Jusef, la fieste de Concordie, i aniversaris di matrimoni a son dome cualchi esempli di ce che don Nino al à metût sù e fat, tai paîs dulà che al è stât plevan.
Chest, forsit, al è stât il grant segret de sô vite sacerdotâl, che lu à fat deventâ pari e fradi dal so popul furlan, dulà che al à spindût lis energjis di zoventût, la fuarce de maturitât e lis magagnis di ogni etât.
Al è il segrêt de pastorâl, forsit l’uniche forme di pastorâl, che purtrop al dì di vuê noaltris predis a stin piardint parcè che sin plui tacâts al ufici, al computer e al celulâr che no a la int.
Naturalmentri, sence dismenteâ la preiere, che ancje e à segnât la vite sacerdotâl di don Nino: ogni dì la recite scrupolose dal breviari e dal Rosari. E la celebrazion de Sante Messe, che soredut inte grandis ocasions al preparave cun grant puntili, massime la predicje: simpri clare, cun peraulis ben scandidis, che a jentravin ta l’anime di chei che a scoltavin, cul so inconfondibil timbri di vôs.
E po dopo la grande devozion che al veve soredut pe Madone, in particolâr pe Madone di Lourdes e di Barbane. Propit devant di chest nestri santuari, plui voltis mi veve confidât che, ancjemò frut, a un pelegrinagjo cul so paîs di Tapoian, vignint fûr di Messe Grande, a sô mari, siora Emma – che ducj a ricuardìn – i veve dit che vuareve fâssi predi: “Mama, io o voi predi!”. E cussì e je stade!
E al è biel, che usgnot, just un mês dopo de sô muart, lu ricuardìn inte vilie de Madone Imacolade, in chest santuari dedicât ae “Madone di Strade” che lui stes al veve tornât a vierzi, e a dâi lustri e impuartance, a pene rivât culì a Cjopris e Viscon. E in cheste Messe, dulà che o ricuardìn un predi, famei dal Signôr, intal vanzeli, la Madone si professe: “serva del Signore”. Serve e famei a son la stesse robe.
Il “sì” de Madone al Signôr al compuarte fin dal principi la disposizion al servizi, la atenzion che vin di vê soredut tai confronts di chei che a an dibisugne.
O vin le prove di chest inte visite che la Madone e fâs a Sante Elisabete, subite dopo l’anunzi dal agnul Gabriel. La disponibilitât viers il Signôr, e cjate confront inte disponibilitât viers di chei che a àn di bisugne.
Ancje a noaltris, nus ven domandât di lâ daûr dal esempli de Madone, praticant il stîl dal servizi e dal aiût.
La fieste de Imacolade, nus judi a fâ di dute la nestre vite un “sì” al Signôr, un “sì” fat di adorazion a Lui, ma ancje di oparis cuotidianis di amôr, di caritât e di servizi.
Cussì e je stade ancje la lungje vite di don Nino: un grant “sì” al Signôr, a la sô volontât e a la nestre Glesie di Gurize. E al è parchest che usgnot lu ricuardìn, preìn par lui e i disìn: grazie, par dut il ben che al à fat.
don Moris Tonso